Hapat e ardhshëm të Kosovës në procesin e integrimit evropian, mbështetja në anëtarësimin në Këshillin e Evropës si dhe rëndësia e një perspektive më të qartë të Kosovës drejt NATO-s, u biseduan në takimin e ushtrueses së detyrës të presidentes së Republikës së Kosovës, Albulena Haxhiu me presidenten e Republikës së Bullgarisë, Iliana Iotova.

Takimi u zhvillua në margjinat e Samitit të Procesit të Bashkëpunimit të Evropës Juglindore (SEECP) në Sofje.

U.D. Presidentja Haxhiu theksoi po ashtu interesimin për thellimin e bashkëpunimit në fushën e mbrojtjes, ekonomisë dhe arsimit, si dhe për forcimin e lidhjeve ndërmjet institucioneve, bizneseve dhe qytetarëve të dy vendeve.

U.D. Presidentja Haxhiu e uroi presidenten Lotova për marrjen e detyrës dhe shprehu mirënjohjen e Kosovës për mbështetjen e vazhdueshme të Bullgarisë ndaj shtetndërtimit, subjektivitetit ndërkombëtar dhe rrugës euroatlantike të Kosovës.

Në takim u përmend edhe komuniteti bullgar në Kosovë, për të cilin U.D. Presidentja Haxhiu ritheksoi përkushtimin e institucioneve të Kosovës për respektimin e të drejtave, përfshirjen dhe pjesëmarrjen e të gjitha komuniteteve në jetën publike.

/Kosovapress/