Kryetari i Aleancës për Ardhmërinë e Kosovës (AAK) Ramush Haradinaj, gjatë një takimi sot me ministrin për Çështje Evropiane të Republikës së Çekisë, Martin Dvorak, ka theksuar domosdoshmërinë për heqjen e sanksioneve të Bashkimit Evropian ndaj Kosovës.

Haradinaj ka falënderuar Dvorak për mbështetjen që Republika e Çekisë i ka dhënë Kosovës në shtet-ndërtim dhe vazhdon ta jep në proceset në të cilat ndodhet.

“Gjithashtu, kërkova nga Dvorak përkrahjen e tij dhe të shtetit çek në aspiratën tonë për integrim evropian, veçmas në synimin tonë për anëtarësimin në NATO. Ritheksova domosdoshmërinë e largimit të sanksioneve nga ana e BE-së ndaj Kosovës, për t’i hapur rrugë zhvillimit dhe ngritjes së mirëqenies në vend”, shkruan Haradinaj në një postim në Facebook.

Bashkimi Evropian vazhdon të mbajë masat penalizuese ndaj Kosovës, të vendosura vitin e kaluar, e të cilat përfshijnë pezullimin e përkohshëm të punës së trupave të krijuara në bazë të Marrëveshjes së Stabilizim Asociimit (MSA), mos ftesën e Kosovës në takime të nivelit të lartë dhe pezullimin e vizitave dypalëshe.

Masat e tjera përfshijnë edhe ndaljen e programimit të fondeve për Kosovën nga IPA 2024 (Instrumentet e Para-Anëtarësimit) si dhe propozimet e Kosovës në kuadër të Kornizës së Investimeve në Ballkanin Perëndimor nuk janë dorëzuar për shqyrtim nga bordi më 29 dhe 30 qershor 2023.

Kearns thirrje Borrellit e Von der Leyenit: Largoni sanksionet ndaj Kosovës • KosovaPress