Qendrat amerikane për Kontrollin dhe Parandalimin e Sëmundjeve (CDC) kanë klasifikuar shpërthimin e hantavirusit si reagim emergjent “Niveli 3”, niveli më i ulët i aktivizimit emergjent.

Megjithëse autoritetet theksojnë se rreziku për publikun mbetet i ulët, situata po monitorohet nga afër nga agjencitë shëndetësore amerikane dhe ndërkombëtare.

Sipas raportit, aktivizimi i Qendrës së Operacioneve të Emergjencës nënkupton ngritjen e një ekipi të posaçëm për koordinimin dhe mbështetjen e reagimit ndaj shpërthimit.

Autoritetet globale të shëndetit po punojnë për të frenuar përhapjen e virusit në bordin e anijes turistike MV Hondius. Shpërthimi lidhet me llojin e hantavirusit të Andeve dhe deri tani ka shkaktuar pesë raste të konfirmuara, tre raste të dyshuara dhe tre viktima mes pasagjerëve të lidhur me këtë udhëtim, sipas Organizatës Botërore të Shëndetësisë.

Anija MV Hondius, me rreth 150 pasagjerë dhe anëtarë ekuipazhi nga 23 shtete, ishte nisur nga Argjentina dhe kishte kaluar Oqeanin Atlantik, përpara se të raportoheshin rastet e para të sëmundjes gjatë lundrimit pranë Kepit të Gjelbër.

/Kosovapress/