Dy punonjës banke u qëlluan për vdekje gjatë një grabitjeje që ndodhi të enjten, në një degë të U.S. Bank në qytetin Berea të shtetit amerikan Kentaki,

Sipas autoriteteve, një burrë i veshur me një kapuç ngjyrë hiri në të bardhë, doreza dhe maskë hyri në bankë dhe qëlloi një burrë dhe një grua, njofton AP, përcjellë KosovaPress.

“Ata janë njerëzit tanë që punojnë në komunitetin tonë dhe nuk janë më me ne”, u tha gazetarëve Scottie Pennington, zëdhënës i Policisë Shtetërore të Kentakit. “Në këtë moment kemi disa pista dhe po bëjmë më të mirën për ta sjellë këtë person të lig para drejtësisë”,

Zyrtarët e rendit po kontrollonin shtëpi më shtëpi në kërkim të informacioneve dhe pamjeve nga kamerat e sigurisë, si dhe po përdornin helikopterë, dronë dhe qen kërkimi, shtoi ai

Nuk ishte e qartë nëse i dyshuari ishte larguar me një automjet, në këmbë apo ishte marrë nga dikush tjetër, tha Pennington teksa refuzoi të tregojë nëse i dyshuari kishte marrë diçka nga banka.

Policia shtetërore publikoi një foto të të dyshuarit në rrjetet sociale dhe u bëri thirrje qytetarëve të telefonojnë nëse e njohin apo kanë informacion.

“Nëse shihni diçka të pazakontë dhe nuk ndiheni mirë për këtë — nëse qentë tuaj po sillen çuditshëm — na telefononi”, tha Pennington.

Ai u bëri thirrje banorëve të jenë vigjilentë, të mbajnë dritat e jashtme ndezur dhe telefonat të karikuar.

Për shkak të kësaj ngjarje, shkollat në zonë u futën përkohësisht në izolim derisa nxënësve nuk iu lejua të ktheheshin në shtëpi me autobusë dhe duhej të merreshin nga prindërit e tyre.

U.S. Bank tha se po bashkëpunon ngushtë me autoritetet dhe është e përkushtuar për të mbështetur familjet e viktimave dhe kolegët e bankës.

“Jemi thellësisht të tronditur nga ngjarja tragjike që mori jetën e dy punonjësve tanë në degën tonë në Berea, Kentaki”, thuhet në një deklaratë të kompanisë. “Zemrat tona janë me familjet e viktimave, kolegët tanë dhe të gjithë komunitetin e Bereas”.