Dy orë pas përfundimit të procesit zgjedhor, Aleanca mbajti konferencë për media.

Kandidati i saj për kryeministër, Ardian Gjini, tha se besimi i dhënë ndaj kësaj partie do të respektohet maksimalisht.

Ai u shpreh se votuesit e Aleancës nuk do të pendohen për besimin e dhënë dhe se partia do ta respektojë maksimalisht çdo votë. Ai vlerësoi se gara zgjedhore nuk është zhvilluar në kushte të barabarta, por shtoi se qytetarët kanë treguar se e kuptojnë situatën dhe e duan vendin e tyre.

“Kurrë nuk kanë me u penduar për votën e vet. Për ne, kjo është një nisje e jashtëzakonshme, edhe të gjithë ata që i kanë besuar asaj që e kemi thënë gjatë kësaj fushate, që besojnë në të ardhmen e Kosovës, që besojnë në një Kosovë që duhet me u bërë mirë për qytetarët e vet, nuk kanë me u penduar kurrë. Kemi me punuar shumë që vota e tyre edhe vullneti i tyre me na votuar kemi me e respektuar maksimalisht. Pavarësisht që kjo garë zgjedhore është mbajtur në një terren absolutisht jo fer, ku janë përdorur të gjitha mjetet e mundshme për me e kthyer rezultatin në favor të pushtetit, prapëseprapë qytetari i Kosovës ka treguar që e kupton të gjithën, ka treguar që e do vendin e vet. Kjo që ne e përfaqësojmë, patjetër që një ditë do të fitojë”, u shpreh Gjini.

Ai shtoi se rezultatet aktuale janë ende preliminare dhe se duhet pritur përfundimi i numërimit për të pasur një pasqyrë të plotë të rezultatit zgjedhor.

Sipas rezultateve preliminare të publikuara nga “Demokracia në Veprim”, Aleanca ka siguruar 7.1 për qind të votave të numëruara deri në atë fazë të procesit.

Në fund të adresimit, Gjini përcolli mesazhin e tij për qytetarët me fjalët: “Duajeni Kosovën”.

/Kosovapress/