Kancelari gjerman Olaf Scholz sot në Bundestag siguroi mbështetjen e plotë të Izraelit pas sulmit të Hamasit dhe njoftoi ndalimin e mbështetjes për këtë organizatë terroriste në Gjermani, si dhe ndalimin e organizatës Samidoun që vazhdimisht bën thirrje për protesta antisemite.

"Ne dënojmë dhunën e terroristëve në termat më të fortë... Izraeli ka të drejtën e garantuar nga ligji ndërkombëtar për të mbrojtur qytetarët e tij nga ky sulm barbar," tha kancelari gjerman Olaf Scholz (Partia Social Demokratike e Gjermanisë SPD) duke iu drejtuar deputetëve gjatë seanca e jashtëzakonshme e Bundestagut kushtuar ngjarjeve aktuale në Izrael.

Ai tha se çështja e sigurisë së Izraelit ishte dhe mbetet çështje e interesit kombëtar për Gjermaninë.

Kancelari gjerman ka njoftuar ndalimin e çdo forme të mbështetjes për Hamasin në Gjermani, siç është mbledhja e ndihmës financiare. Në të njëjtën kohë, ai njoftoi ndalimin e organizatës Samidoun, e cila deri më tani në Gjermani, nën maskën e ndihmës së të burgosurve palestinezë në burgjet izraelite, organizonte protesta që rezultuan në incidente të shumta antisemitike.

Këtë javë, policia në Berlin ndaloi tri protesta që Samidoun u përpoq të organizonte, pasi anëtarët e asaj organizate festuan hapur në rrugët e Berlinit të shtunën, pas sulmit terrorist në Izrael. Në të njëjtën kohë, u rrit shkalla e sigurisë së objekteve hebraike dhe izraelite në Gjermani.

"Kjo është e neveritshme. Kjo është çnjerëzore. Kjo shkon kundër të gjitha vlerave për të cilat ne jemi të përkushtuar si vend," tha Scholz për ngjarjen e së shtunës. "Ne nuk pranojmë urrejtje dhe nxitje pa veprim. Ne nuk tolerojmë antisemitizmin," shtoi ai.

Lideri i Unionit të opozitës CDU/CSU Friedrich Merz bëri thirrje për një luftë më të qëndrueshme kundër antisemitizmit dhe i quajti skenat e festimit të emigrantëve arabë në Gjermani "të padurueshme" pas sulmit të Hamasit.

Përfaqësuesi i Partisë Liberal Demokratike (FDP) në pushtet Christian Duerr dërgoi një mesazh paralajmërues për emigrantët. "Askush nuk është i mirëpritur që vjen në Gjermani për të nxitur kundër Izraelit," tha Duerr.

Izraeli i ka kërkuar Gjermanisë të dorëzojë municione për anijet luftarake dhe Gjermania tashmë ka premtuar se do të dërgojë drone Heron TP në Izrael.

Në fjalimin e tij, Scholz dënoi ashpër Iranin për mbështetjen e terroristëve në Rripin e Gazës dhe mbrojti një qëndrim më të ashpër ndaj Teheranit. Kancelari gjerman dënoi gjithashtu presidentin e territorit autonom palestinez të Bregut Perëndimor, Mahmud Abbas, për mungesën e reagimit ndaj sulmeve të Hamasit.

"Ku është dënimi i dhunës terroriste? Heshtja juaj është e turpshme," tha Scholz dhe njoftoi një "rishikim të plotë" të bashkëpunimit dhe ndihmës për territoret palestineze.

Hamasi, grupi militant islamik që sundon Gazën, nisi të shtunën një sulm të befasishëm në shkallë të gjerë ndaj komuniteteve civile izraelite.

Izraeli u përgjigj me sulme të vazhdueshme ajrore në enklavën bregdetare me popullsi të dendur. Më shumë se 1.200 njerëz në secilën anë u vranë.

​Siria: Izraeli na sulmoi - KosovaPress