Forcat e NATO-s, nëse është e nevojshme, mund të marrin enklavën ruse Kaliningrad në një "kohë të paimagjinueshme të shkurtër", tha gjenerali Chris Donahue, komandant i forcave tokësore amerikane në Evropë dhe Afrikë, raporton Defense News.

Deklarata e tij vjen në një kohë tensionesh të larta midis Aleancës dhe Rusisë dhe vendosjes së një strategjie të re të NATO-s të njohur si "Vija e Parandalimit në Krahun Lindor", raporton KosovaPress.

Donahue pretendon se aftësitë e sotme të Aleatëve lejojnë që "zona të merret nga toka më shpejt se kurrë më parë".

Doktrina e re e NATO-s parashikon forcimin e forcave tokësore, integrimin e industrisë së mbrojtjes dhe futjen e sistemeve dhe lëshuesve digjitalë të standardizuar në mënyrë që të arrihet koordinim i shpejtë në fushën e betejës.

"Dimensioni tokësor nuk po humbet rëndësi, po bëhet më i rëndësishëm. Tani nga toka mund të neutralizoni zonat ku vepron armiku. Nga toka mund të merrni kontrollin e detit. Po i shohim të gjitha këto në Ukrainë", tha Donahue.

Leonid Slutsky, kryetar i komitetit të punëve të jashtme të parlamentit rus, reagoi shpejt ndaj deklaratave të Donahue.

"Një sulm ndaj rajonit të Kaliningradit është i barabartë me një sulm ndaj Rusisë. Të gjitha përgjigjet janë të mundshme, përfshirë përdorimin e armëve bërthamore", tha Slutsky.

Kalinigradi, një territor rus i fortifikuar rëndë i vendosur midis Polonisë dhe Lituanisë, është i rrethuar nga vendet anëtare të NATO-s dhe është vetëm 75 kilometra i gjerë. Ai është një nga rajonet më të militarizuara në Evropë dhe prej kohësh ka qenë një pikë e nxehtë e mundshme për konflikt midis NATO-s dhe Rusisë.

Konfigurimi i ri mbrojtës i NATO-s është një përgjigje ndaj paralajmërimeve nga agjencitë perëndimore të inteligjencës se Rusia mund të paraqesë një kërcënim të drejtpërdrejtë ushtarak për vendet anëtare të Aleancës në pesë vjetët e ardhshme.