Qeveria e Jemenit njoftoi të shtunën se anija britanike Rubymar u fundos në Detin e Kuq “për shkak të faktorëve të motit dhe erërave të forta”.

"Ne njoftojmë fundosjen e anijes M/V Rubymar mbrëmjen e djeshme, e premte, që përkon me kushtet e motit dhe erërat e forta të dëshmuara në det", tha në një deklaratë Menaxhmenti i Krizave të anijes së ngarkesave Rubymar e formuar nga qeveria e Jemenit.

Qeveria shprehu “keqardhjen për fundosjen e anijes, e cila do të shkaktojë një katastrofë mjedisore në ujërat territoriale të Jemenit dhe Detin e Kuq”.

Anija britanike Rubymar, e cila u vu në shënjestër nga Houthis më 18 shkurt, mbante sasi të mëdha amoniaku dhe vajrash, sipas agjencisë zyrtare Saba.

Të shtunën e kaluar, qeveria jemenase tha se anija po shkonte drejt ishujve jemenas Hanish në Detin e Kuq, gjë që kërcënon një "katastrofë të madhe mjedisore".

Ndërkohë, Komanda Qendrore e SHBA (CENTCOM) tha të shtunën e kaluar se "sulmi i paprovokuar dhe i pamatur nga terroristët Houthi të mbështetur nga Irani shkaktoi dëme të konsiderueshme në anije, e cila shkaktoi një njollë nafte prej 18 miljesh".

Grupi Houthi jemenas ka shënjestruar anije mallrash në Detin e Kuq dhe Gjirin e Adenit në pronësi ose operim të kompanive izraelite ose që transportojnë mallra drejt dhe nga Izraeli në solidaritet me Rripin e Gazës, i cili ka qenë nën një sulm izraelit që nga 7 tetori.

Me rritjen e tensioneve për shkak të sulmeve të përbashkëta të SHBA-së dhe Britanisë së Madhe kundër objektivave Houthi në Jemen, grupi deklaroi se i konsideronte të gjitha anijet amerikane dhe britanike objektiva legjitime ushtarake. /AA/