Lideri i Lëvizjes Vetëvendosje, Albin Kurti, i ka dërguar letër për takim liderëve të partive parlamentare për të diskutuar për formimin e institucioneve të reja.

Këtë për KosovaPress e ka konfirmuar zëdhënësi i Qeverisë së Kosovës, Fatlum Jashari.

“Po, sot në mëngjes kryeministri Kurti u ka dërguar letër për takim tre kryetarëve të PDK-së, LDK-së dhe AAK-së”, tha Jashari për KosovaPress.

Ftesa e Kurtit ndaj kryetarit të PDK-së, Bedri Hamza, kryetarit të LDK-së, Lumir Abdixhiku, dhe kryetarit të Aleancës, Ardian Gjini, vjen një ditë pas certifikimit të rezultateve zgjedhore të 7 qershorit.

Nga këto zgjedhje, parti e parë ka dalë Lëvizja Vetëvendosje me 47.13%, apo 53 ulëse në Kuvend. E dyta, Partia Demokratike e Kosovës, me 19.44%, apo 22 deputetë. Ndërkaq, Lidhja Demokratike e Kosovës, me 16.69%, ka fituar 18 ulëse, si dhe Aleanca, me 6.74%, shtatë ulëse. Kurse komunitetet joshumicë kanë siguruar 20 ulëse.

Certifikimi i rezultateve do t’i hapë rrugë formimit të institucioneve të reja, ku Kuvendi ka afat tridhjetë ditë që të mblidhet për t’u konstituuar.

Krahas konstituimit dhe formimit të qeverisë, deputetët e legjislaturës së njëmbëdhjetë duhet të zgjedhin edhe presidentin e vendit. /E. Zeqiri/