Përzgjedhësi i Kosovës, Franco Foda, u tregua mjaft i vendosur kur u pyet për reagimin e mundshëm ndaj provokimeve apo thirrjeve eventuale kundër Kosovës në stadiumin e Bratisllavës në konferencën para mediave.

Tekniku gjerman bëri të qartë se prioriteti i tij është vetëm fitorja.

"Nesër kemi një punë për të bërë dhe ajo është të fitojmë. Duhet të fokusohemi vetëm te kjo detyrë, çdo gjë tjetër jashtë saj nuk më intereson," deklaroi Foda, duke izoluar kështu ekipin nga çdo faktor i jashtëm që mund të prishë qetësinë e lojtarëve.

Nga ana tjetër, menaxheri i Kombëtares, Bajram Shala, u ndal te kushtet organizative dhe ato atmosferike, duke konfirmuar se ekipi është i përgatitur për çdo skenar. Ndonëse priten reshje shiu që mund të rëndojnë gjendjen e fushës, Shala theksoi se kjo nuk do të shërbejë si arsyetim pasi kushtet do të jenë të njëjta për të dyja palët.

Gjithashtu, sa i përket sigurisë dhe rregullave në stadium, ai sqaroi se mjetet dhe simbolet kombëtare do të lejohen vetëm brenda tribunave gjatë zhvillimit të ndeshjes, duke bërë thirrje për respektimin e protokolleve të organizatorit.

KosovaPress