FIFA ka vendosur të mos ndërmarrë masa disiplinore ndaj trajnerit të Kombëtares së Egjiptit, Hossam Hassan, pas festimit të tij me flamurin palestinez pas fitores ndaj Australisë në Kupën e Botës.

Vendimi i shtëpisë më të madhe të futbollit në botë ka shkaktuar reagime në Izrael, ku është kritikuar mosndëshkimi i trajnerit egjiptian. Gazeta izraelite “Israel Hayom” e ka cilësuar këtë vendim si një pengesë për përpjekjet për të kërkuar masa disiplinore ndaj Hassanit.

Incidenti ndodhi pas ndeshjes së 1/8 së finales, ku Egjipti mposhti Australinë. Në momentet e festës në fushë, Hossam Hassan u shfaq duke mbajtur një flamur palestinez dhe deklaroi: “Zemra dhe shpirti im janë me palestinezët”, duke ia kushtuar suksesin popullit egjiptian dhe atij palestinez.

Sipas raportimeve të mediave izraelite, FIFA ka sqaruar se mbajtja e flamurit palestinez nuk përbën shkelje të rregullave të turneut, pasi Palestina është një nga 211 asociacionet anëtare të organizatës.

“Flamujt e të gjitha asociacioneve anëtare të FIFA-s lejohen në garat e organizuara nga FIFA”, ka bërë të ditur institucioni qeverisës i futbollit, duke hedhur poshtë pretendimet se veprimi i trajnerit egjiptian përbënte një demonstratë të ndaluar politike.

Për pasojë, ndaj Hossam Hassan nuk është hapur asnjë procedurë disiplinore dhe ai pritet të vazhdojë të drejtojë Egjiptin në pjesën e mbetur të Kampionatit Botëror.

Mediat izraelite e kanë krahasuar këtë rast me vendimin e mëhershëm të FIFA-s për ndalimin e përdorimit të flamurit të Iranit para vitit 1979 gjatë turneut, duke theksuar se organizata bën dallim mes simboleve të asociacioneve të njohura anëtare dhe atyre që nuk përfshihen në rregulloret e saj.

Vendimi i FIFA-s ka rihapur debatin për raportin mes sportit dhe shprehjeve politike, ndërsa reagimet kanë qenë të ndara mes përkrahësve dhe kritikëve të këtij qëndrimi.

 KosovaPress