Erërat e forta me shi të rrëmbyeshëm gjatë ditës së sotme kanë shkaktuar dëme materiale në objektin banesor afër Qendrës Kryesore të Mjekësisë Familjare në Skenderaj.

Në njoftimin e kësaj komune thuhet se përveç fasadës së jashtme në një pjesë të objektit e cila ka rënë në tokë duke dëmtuar veturat afër ndërtesës, fatmirësisht ka kaluar pa pasoja tjera.

“Ekipet e Drejtorisë së Shërbimeve Publike bashkë me zyrtarët policorë, kanë dalë menjëherë në vendin e ngjarjes, duke shirituar zonën e rrezikut dhe janë në gjendje gatishmërie për çdo situate”, thuhet në komunikatë.

Më tej thuhet se Komuna e Skenderajt shumë shpejt do të ndërmarrë të gjitha veprimet për të sanuar dëmet e shkaktuara.

Erëra të fuqishme dhe reshje shiu kanë përfshirë disa qytete në vend, ky destabilizim i motit vjen pas disa ditëve ku vendi ishte përfshirë nga temperatura të larta deri 33 gradë celsius.

Në rrjetet sociale janë publikuar disa pamje nga Podujeva, Skenderaj dhe Peja.

Instituti Hidrometeorologjik i Kosovës ka paralajmëruar se sot në vendin tonë mund të ketë reshje shiu dhe shkarkime rrufesh.

https://kosovapress.com/ihmk-paralajmeroi-stuhi-e-bresher-komuna-e-prishtines-del-me-rekomandime