Për aplikimin e reduktimeve me energji elektrike, shoqëria civile, Dhoma e Tregtisë dhe Industrisë, si dhe opozita sot kritikuan ashpër Qeverinë e Kosovës për keq menaxhim të krizës energjetike dhe për mos veprim adekuat.

Të njëjtit kërkuan nga ekzekutivi me urgjencë të ndërmarrë masa adekuate që të mos vijë deri te vazhdimi i ndërprerjeve të energjisë elektrike, siç është paralajmëruar nga KEDS 6 orë me rrymë dhe 2 orë pa rrymë.

Drejtori në Institutin për Politika Zhvillimore (INDEP) Burim Ejupi thekson se fajin për mos furnizim të rregullt me energjie elektrike, e bart kryesisht kryeministri Albin Kurti.

Ejupi thotë për KosovaPress se reduktimet që nisen sot nga KEDS, janë edhe si rrjedhojë e shpalljes së gjendjes emergjente për energji nga Kuvendi i Kosovës propozuar nga ekzekutivi. Ai thotë se po të mos kishte gjendje emergjente, KEDS-KESCO nuk do të kishin të drejtë të aplikonin reduktime.

“Pse kemi tash reduktime? Kjo është si pasojë e votimit në Kuvendin e Kosovës për shpalljen e gjendjes emergjente energjetike të propozuar nga qeveria e Kosovës. Kjo emergjencë i ka mundësuar edhe KESCO-s që varësisht prej nevojave të prodhimit dhe politikave që i bëjnë akterët në fushën e energjisë, të ketë edhe reduktime të energjisë. Sot këto reduktime veç kanë filluar, se kush është fajtor? Fajtor është ai që është në krye. Edhe meritat edhe fajin duhet ta marrë ata që janë në krye të qeverisë, pasi që nuk kanë bërë asgjë. Qytetarët e Kosovës në mes të muajt gusht pas 12 vjetëve mbesin pa rrymë. Sot ne është dashur dy orë me mbyll zyrën për shkak se s'patëm energji elektrike. Dihet se shumica e bizneseve në Kosovë janë të varur nga furnizimi i rregullt me energji elektrike”, thotë ai.

Ndërsa, koordinatorja në Dhomën e Tregtisë dhe Industrisë në Kosovë, Qendresa Ibrahimi thotë për KosovaPress se reduktimet e energjisë elektrike në këtë kohë të rëndë për bizneset, do t’i dëmtonin në masë të madhe ato dhe pasojat do të jenë në humbjen e tregut si brenda ashtu edhe jashtë vendit si dhe në humbjen e vendeve të punës.

Ibrahimi thotë se Dhoma e Tregtisë ashtu edhe siç ka kërkuar edhe më herët, kërkon që Qeveria e Kosovës të ndërmarrë masa paraprake dhe KEDS të furnizojë 24 orë më energji elektrike bizneset, dhe me urgjencë të ndërmarrë masa adekuate që të mos vije deri te vazhdimi i ndërprerjeve të energjisë elektrike, siç është paralajmëruar nga KEDS-i 6 orë me rrymë dhe 2 orë pa rrymë.

“Ne konsiderojmë se është shumë e dëmshme për gjithë qytetarët e në veçanti për bizneset, duke marrë parasysh faktin nuk mund të bëhen planifikimet e prodhimit ditor dhe organizimit të punës gjatë ditës duke u ballafaquar me reduktime të tilla. Ne si Odë vazhdimisht kemi kërkuar edhe në takimet me institucionet, po ashtu kemi përcjellë edhe shkresa te kryeministri Kurti dhe ministrja e Ekonomisë që të mundësohet blerja e energjisë elektrike nga prodhuesit vendor. Kjo për faktin se çmimet e energjisë elektrike janë shumë të larta sidomos fermerët dhe investitorët e ndryshëm në vendin tonë të cilët kanë investuar në panelet solare prodhojnë energji elektrike, mirëpo të njëjtën nuk mund ta shesin për shkak se ZRRE-ja një gjë të tillë nuk e lejon, andaj, ne kemi kërkuar që të mundësohet blerja e energjisë elektrike duke qenë se varemi kryesisht nga importi dhe një gjë e tillë do të ndikonte sa do pak që të krijohen lehtësira në këtë kohë të krizës”, thotë ajo.

Drejtori në Institutin për Politika Zhvillimore (INDEP), Ejupi ka thënë po ashtu se Qeveria ishte dashur ta zbatojë vendimin për 90 milionë euro ndaj KESCO-s.

“Është dashur po atë ditë që janë zotuar të alokohen mjetet. Është vendimi një ditë para vendimit të ZRRE-së, qeveria ka marrë vendim t’i ndajë 90 milionë euro KESCO-s. Sipas atij vendimi, unë kam pritur që këto mjete i shkojnë KESCO-s të nesërmen. Është vendim i qeverisë. Sot qytetarit të Kosovës nuk i intereson kush është fajtor, atij i intereson sot 2 orë s’ka me pasur energji elektrike”, thotë ai.

Ejupi po ashtu ka thënë se nuk ka asnjë iniciativë nga Qeveria tash e një vit rreth krizës energjetike dhe nuk ka një plan për eficiencë të energjisë dhe për subvencionimin e saj për ta zbutur krizën energjetike. 

Ndërsa, sipas Ministrisë së Ekonomisë, institucionet përgjegjëse që monitorojnë punën e akterëve të furnizimit me energji, janë duke marrë të gjitha hapat që furnizimi me energji elektrike t’i kthehet normalitetit.

Ministria e Ekonomisë kërkon nga të gjithë që të kursehet në maksimum. Prodhimi ditor i KEK-ut është rreth 507 MWh, ndërsa kërkesa për konsum është deri në 750 MWh. Çmimi në bursën hungareze (HUPX) është rreth 430 euro për MWh.