Me 59 vota për, tre abstenime dhe tre kundër, Kuvendi i Kosovës ka votuar për emërimin e anëtarëve të rinj të Bordit të Agjencisë Kosovare të Privatizimit (AKP), raporton KosovaPress.

Kryesuesi i këtij bordi është zgjedhur Hekuran Nikçi, anëtarë Blerina Batusha, Berat Isa, Arbër Gojani, Atdhe Hykolli dhe Feim Kelmendi.

Këtë arsyetim para deputetëve e ka bërë ministri në kabinetin e qeverisë, Elbert Krasniqi.

E sipas shefit të Grupit Parlamentar të PDK-së, Arian Tahiri, ministrave e Kurtit i ‘vie marre t’i propozojë emrat”, pasi që sipas tij, LVV dhe kreu i saj kanë “luftuar” për mbylljen e AKP-së.

“Të gjithë ishim dëshmitarë me prit se kush nga qeveria po e prezanton këtë pikë. A e dini pse? Se iu vie marre qeverisë, Kurtit se 20 vite ka gjuajtur gurë e ka kallur këtë vend, kanë shkuar njerëzit në burg, themelues të VV-së me qëllimin që duhet ta lëshojnë AKP-në, e sot mbas 26 vite e bjen në kuvend të Kosovës me emërua bordin e ri. Qysh ndihen themeluesit e VV-së sot, për ata i vie marre Kurtit dhe ministrave të tij. Duhet të reflektoj secili deputet dhe mos ta votojnë.. Shikoni anëtarët e propozuar, tre-katër prej tyre e keni procedurë penale për korrupsion”, tha Tahiri.

Deputetja nga LDK-ja, Janina Ymeri ka propozuar që të zgjedhurit t’i marrin direkt nga burgu pasi që tre nga shtatë anëtarët janë të akuzuar për çështje penale.

“Dhe AKP kemi thënë se do të shuhet, kjo është deklaratë e maj 2021 kur Albin Kurti ka thënë se AKP do ta shuaj, por ai nuk e ka ditë prej asaj dite tek ma vonë funksionon sipas profiterizmit klasit shtetërorë, sipas parasë e jo sipas parimit. Nga shtatë të akuzuar tre me çështje penale. Unë propozoj që t’i marrin direkt nga burgu dhe saktë i dini se kë t’i merrni. Ju çka të thotë partia e votoni”, tha Ymeri.

Çuditëse i duket edhe deputetes së AAK-së, Time Kadrijaj, që të gjitha kauzat që VV dikur i ka kundërshtuar si opozitë po i bëjnë realitet.

“Shumë çuditshëm është që krejt ato që i keni pasur kauza që i keni kundërshtuar kur keni qenë opozitë krejt i keni bë realitet. Keni thënë që nuk ka më me pas agjencion dhe keni vazhduar me shpronësime me këtë agjencionin e pronave për privatizim dhe sot e merrni si të mirëqenë. A po i bie se qeveria krejt ata njerëz që kanë shërbyer nuk ka lidhje a kanë pasur aktakuza, nuk ka lidhje a janë nxënë me drogë apo çka ju e avanconi nëpër pozita udhëheqëse se ju kanë shërbyer kauzave të juaja”, tha Kadrijaj.

E shefja e Grupit Parlamentar të VV-së, Arbërie Nagavci tha se në momentin që të votohet Fondi Sovran do të mbyllet Agjencia Kosovare për Privatizim.

“Fondi sovran i cili ka qenë zotim i joni dhe do të zëvendësoj AKP-në, është miratuar këtu në këtë kuvend 15 dhjetor 2023 me 62 vota për dhe këtë e keni dërguar në Gjykatës Kushtetuese, ku po pret që 852 ditë të marrim përgjigjen. Sapo të miratohet fondi sovran do të mbyllet dhe AKP, mos u brengosni fare për këtë, e votojmë e vazhdojmë tutje. Kemi ftuar një seancë në 17:00 me temë të rëndësishme, unë po pres nënshkrimet tuaja”, tha Nagavci.

/Kosovapress/