Federata e Karatesë e Kosovës ka bërë të ditur se dy nga garuesit e përfaqësueses së tyre do të udhëtojnë drejt Romës, për të marrë pjesë në garën prestigjioze Karate 1 - Premier League, një nga ngjarjet më të rëndësishme në kalendarin botëror të karatesë.

Në këtë garë elitare, Kosovën do ta përfaqësojnë dy sportistët Islam Selmani në kategorinë -60 kilogramë dhe Betim Maliqi në kategorinë -75 kilogramë.

Garuesit kosovarë do të qëndrojnë në Romë nga data 15 deri më 18 mars 2026, ku do të përballen me karateistët më të mirë të botës. Në këtë garë marrin pjesë vetëm 32 garuesit më të mirë në ranglistën botërore për secilën kategori, gjë që e bën këtë kompeticion ndër më të fortët në sportin e karatesë.

Së bashku me sportistët në këtë garë do të udhëtojë edhe trajneri i përfaqësueses, Agron Tosuni.

Federata e Karatesë e Kosovës, u ka uruar sportistëve suksese dhe një paraqitje sa më të mire, në këtë garë të rëndësishme ndërkombëtare.

KosovaPress