Deputeti nga radhët e AAK-së, Shemsedin Dreshaj, ka reaguar pas zhvillimeve sot në Komisionin hetimor për subvencionimin e teksteve shkollore ku deputetët e Vetëvendosjes në kundërshtim me ligjin dhe rregulloren kanë zgjedhur kryesuesin e këtij komisioni. 

Dreshaj, i cili është kryesues i komisionit, ka thënë se deputetët e partisë në pushtet kanë nxjerrë nga mbledhja edhe stafin teknik të Kuvendit që kanë tërhequr vërejtjen për shkeljet gjatë mbledhjes. Ai ka përkujtuar se kryesuesin dhe zëvendëskryesuesin e komisionit e zgjedh vetëm Kuvendi. 

"Në përpjekje për të fshehur manipulimet me subvencionimin e teksteve shkollore, deputetët e Vetëvendosjes sot paskan vendosur të bëjnë puç në Komisionin Hetimor që e kryesoj unë. Në kundërshtim me Ligjin e me rregullore, paskan vendosur që në Komision të zgjedhin kryesuesin e zëvendëskryesuesin e Komisionit Hetimor. Por këtë të drejtë e ka vetëm Seanca Plenare e Kuvendit, o të mjerë", ka shkruar Dreshaj. 

Reagimi i plotë në Facebook: 

Nuk fshihet dielli me shoshë o të mjerë!

Në përpjekje për të fshehur manipulimet me subvencionimin e teksteve shkollore, deputetët e Vetëvendosjes sot paskan vendosur të bëjnë puç në Komisionin Hetimor që e kryesoj unë.

Në kundërshtim me Ligjin e me rregullore, paskan vendosur që në Komision të zgjedhin kryesuesin e zëvendëskryesuesin e Komisionit Hetimor. Por këtë të drejtë e ka vetëm Seanca Plenare e Kuvendit, o të mjerë.

Kjo nuk është parë e nuk është dëgjuar ndonjëherë. Po Komisionet hetimore në praktikat parlamentare në gjithë botën i udhëheq opozita. Dyshoj të jetë ndryshe edhe në Korenë e Veriut. Madje, deputetët e VV-së kanë nxjerrë nga mbledhja edhe stafin teknik të Kuvendit që kanë tërhequr vërejtjen për shkeljen e Ligjit dhe të Rregullores për mbarëvajtjen e punës në komisionet hetimore parlamentare.

Për këtë maskarallëk, i kam shkruar edhe kryetarit të Kuvendit, të shohë nëse ai ka gjë në dorë e ta ndalë këtë maskaradë të VV-së.