Fadil Fazliu nga Prishtina ka vendosur të përzgjedhë mjekun familjar për të dhe anëtarët e tjerë në shtëpi.

Ai i ka ndjekur të gjitha procedurat për këtë përmes platformës e-Kosova, duke bërë plotësimin e të dhënave personale bazuar në gjendjen civile.

Megjithatë, thotë se ende nuk ka marrë ndonjë shërbim prej tij.

Përzgjedhja e mjekut familjar brenda zonës së banimit është projekt në përputhje me Planin e Veprimit për përcaktimin e kritereve për regjistrin e banorëve në Kujdesin Parësor Shëndetësor.

Ky është projekt i Ministrisë së Shëndetësisë i cili nga 25 shtatori është shtrirë në tërë territorin e Kosovës, pas një periudhe testuese në vetëm katër komuna të vendit.

Procesi i përzgjedhjes pritet të përfundojë në fund të vitit të ardhshëm.

Por, Fadil Fazliu është ndër të paktët qytetarë që janë të mirë-informuar se përmes platformës e-Kosova mund të zgjedhin mjekun e tyre familjar brenda zonës së banimit.

Fetije Blaku, banore e Prishtinës thotë se nuk është e informuar rreth kësaj.

Në situatë të njëjtë është edhe Hava Lahu, gjithashtu banore e Prishtinës.  

Në anën tjetër, Rexhep Fazliu ka informacione për mundësinë e përcaktimit të mjekut të familjes por ende nuk ka aplikuar në platformë.

Nga Ministria e Shëndetësisë thonë se Kosova ka kapacitete mjekësore për realizmin e këtij projekti.

Zëvendësministri Arsim Berisha thotë KosovaPress se projekti për zgjedhjen e specialistit të mjekësisë familjare lehtëson punën e profesionistëve shëndetësorë dhe rrit mirëqenien e pacientëve.

Berisha thotë se me projektin për përzgjedhjen e mjekut familjar synohet edhe ofrimi i shërbimeve të rregullta për pacientët.

Përzgjedhja e mjekut familjar është mirëpritur nga Shoqata e të Drejtave të Pacientëve të Kosovës.

Projekti, sipas kryetarit Besim Kodra, është i vonuar por ofron mundësi për trajtim më cilësor për pacientët kosovarë.

Por nga Oda e Mjekësve e Kosovës konsiderojnë se ky projekt nuk mund të jetësohet derisa mungojnë sigurimet shëndetësore.

Sipas kryetarit Pleurat Sejdiu, Kosova nuk i ka krijuar parakushtet për funksionalizimin e këtij projekti.

Sejdiu shprehet skeptik për ecurinë e projektit të zgjedhjes së mjekut familjar edhe për shkak të numrit të specialistëve të mjekësisë familjare që janë të punësuar në sistemin parësor shëndetësor.

Në Kosovën me rreth 1.6 milionë banorë, sistemi parësor shëndetësor është i shtrirë në të gjitha komunat.