Policia e Kosovës dhe Prokuroria Speciale e Republikës së Kosovës kanë zhvilluar një operacion të gjerë kundër krimeve të luftës, i koduar “SYRIGANA”, që ka rezultuar me arrestimin e pesë personave të dyshuar për krime lufte kundër popullatës civile.

Sipas Policisë, hetuesit nga Drejtoria për Hetimin e Krimeve të Luftës kanë zhvilluar hetime intensive lidhur me vrasjen e gjashtë civilëve shqiptarë në fshatin Syriganë, në Komunën e Skenderajt, gjatë periudhës maj–qershor 1998. Gjatë hetimeve janë siguruar prova materiale dhe dëshmi relevante, ndërsa është përpiluar kallëzim penal i cili i është dorëzuar Prokurorisë Speciale.

Me autorizim të prokurorit të rastit, sot në orët e hershme të mëngjesit, duke filluar nga ora 06:00, është zbatuar plani operativ në gjashtë lokacione – pesë në Skenderaj dhe një në Mitrovicën e Veriut – ku janë arrestuar pesë të dyshuarit.

Gjatë operacionit, me urdhër verbal për bastisje të miratuar nga Gjykata Themelore në Prishtinë – Departamenti Special, janë kontrolluar objekte banimi dhe hapësira përcjellëse. Në cilësinë e provave materiale janë konfiskuar një armë gjysmë-automatike SKS (7.62 x 39 mm), një armë brezi Zastava M-57 (7.62 x 25 mm), dy karikatorë me 77 fishekë, një pushkë gjuetie 12 GA me 17 fishekë, si dhe uniforma dhe pjesë të uniformave të ish-ushtrisë jugosllave.

Me vendim të prokurorit special, të arrestuarve u është caktuar masa e ndalimit për 48 orë, ndërsa procedurat e mëtejme ligjore janë në vijim.

/Kosovapress/