27 vjet më parë, në datën e sotme, më 10 qershor 1999, Këshilli i Sigurimit i Kombeve të Bashkuara miratoi Rezolutën 1244, që ishte dokumenti i cili shënoi fundin formal të luftës në Kosovë.

Po ashtu, ky “ligj” i OKB-së, krijoi bazën juridike për vendosjen e forcave ndërkombëtare të sigurisë dhe administratës civile ndërkombëtare në vendin që pikërisht në këtë ditë, po kalonte nëpër “tehun tranzicional” nga lufta, në paqe.

Rezoluta u miratua pas ndërhyrjes ajrore 78 ditore të NATO-s kundër forcave të ish-Jugosllavisë dhe parashihte vendosjen në Kosovë të një pranie ndërkombëtare civile dhe të sigurisë nën ombrellën e Kombeve të Bashkuara.

Përmes këtij dokumenti, Sekretari i Përgjithshëm i OKB-së autorizohej të emëronte një Përfaqësues Special, i njohur ndryshe edhe si shef I UNMIK-ut, për të mbikëqyrur zbatimin e pranisë civile ndërkombëtare, ndërsa shtetet anëtare dhe organizatat ndërkombëtare autorizoheshin të krijonin praninë ndërkombëtare të sigurisë në Kosovë.

1244-shi hapi rrugën për vendosjen e KFOR-it, forcës paqeruajtëse të udhëhequr nga NATO, me mision garantimin e sigurisë dhe krijimin e një mjedisi të qëndrueshëm për qytetarët e Kosovës, pas përfundimit të konfliktit.

Po ashtu, dokumenti autorizonte krijimin e Misionit të Administratës së Përkohshme të Kombeve të Bashkuara në Kosovë (UNMIK), i cili mori përgjegjësinë për administrimin civil të territorit, ndërtimin e institucioneve dhe organizimin e jetës publike deri në krijimin e institucioneve vendore kosovare.

Në tekstin e rezolutës përcaktohet se prania civile ndërkombëtare do të siguronte një administratë të përkohshme për Kosovën, duke krijuar kushtet që qytetarët të ushtronin vetëqeverisje substanciale dhe të ndërtoheshin institucionet demokratike, më pastaj.

Rezoluta 1244 parashihte gjithashtu që prania civile dhe ajo e sigurisë të vendoseshin fillimisht për një periudhë 12-mujore, me mundësi vazhdimi derisa Këshilli i Sigurimit të vendoste ndryshe.

Përveç dispozitave për administrimin dhe sigurinë, dokumenti përfshinte edhe parimet për zgjidhjen e krizës së Kosovës, të miratuara nga ministrat e Jashtëm të vendeve të G8-s në Petersberg të Gjermanisë më 6 maj 1999.

Sot, 27 vjet pas miratimit të saj, Rezoluta 1244 mbetet një nga dokumentet më të rëndësishme në historinë moderne të Kosovës, pasi shënoi përfundimin e luftës, tërheqjen e forcave serbe dhe fillimin e periudhës së administrimit ndërkombëtar që parapriu proceset politike që çuan deri te shpallja e pavarësisë së Kosovës në vitin 2008.

OKB-ja vazhdon ta ketë misionin e saj në Kosovë, UNMIK-un, por pa ndonjë kompetencë për të marrë ndonjë vendim për shtetin e ri.

Autoritetet e Republikës kanë kërkuar moti që ky mision të shuhet, me arsyetimin se prania e tij në një vend të pavarur, nuk ka më asnjë kuptim. /Kosovapress/

/Kosovapress/