Një gjykatë në Turqi ka dënuar sot me nga 18 vjet e pesë muaj burg pronarin dhe arkitektin e një hoteli që u shemb gjatë një tërmeti në vitin 2023, duke vrarë 72 persona.

Ahmet Bozkurt dhe arkitekti Erdem Yılmaz u dënuan me nga 18 vjet e pesë muaj burg, ndërsa djali i Bozkurt, Mehmet Fatih u dënua me 17 vjet e katër muaj.

Hoteli, i vendosur në qytetin juglindor Adiyaman, po priste një ekip shkolle volejbolli nga Qiproja veriore dhe një grup udhërrëfyesish në kohën e tërmetit shkurtin e kaluar.

Tre persona u dënuan për shkaktim të vetëdijshëm të vdekjes ose plagosjes së disa personave, raporton BBC.

Kryeministri i komunitetit turk qipriot, Unal Ustel, tha se dënimet ishin shumë të lehta dhe se autoritetet do të apelonin.

"Pronarët e hoteleve nuk morën dënimin që prisnim. Por, pavarësisht kësaj, të gjithë përgjegjës për ndërtimin e hotelit, përfshirë edhe arkitektin, u dënuan. Kjo na bëri pjesërisht të lumtur", tha Ustel.

Mbi 50 mijë njerëz vdiqën në Turqi dhe Siri në tërmetin e 6 shkurtit 2023. Rreth 160 mijë ndërtesa u shkatërruan ose u dëmtuan rëndë, duke lënë 1.5 milion njerëz të pastrehë.

Qeveria turke njoftoi disa javë më vonë se qindra njerëz ishin nën hetime dhe rreth 200 persona ishin arrestuar, duke përfshirë kontraktuesit dhe pronarët e pronave.