Numri i të vdekurve nga përmbytjet masive në Tajlandë është rritur në 12, me mbi 640.000 familje të prekura, thanë autoritetet të dielën.

Pesë persona u mbytën në Songkhla jugore, tre në Pattani, dy në Narathiwat dhe nga një në provincat Phatthalung dhe Yala, raportoi Bangkok Post të dielën, duke cituar Departamentin e Parandalimit dhe Zbutjes së Fatkeqësive.

Ekipet e shpëtimit dhe punonjësit e bashkisë gërmuan nëpër mbeturina dhe filluan të riparojnë rrugët në qendrën ekonomike jugore të Tajlandës, ndërsa përmbytjet në provincat jugore mbeten serioze.

Hat Yai, qendra ekonomike në jug të Tajlandës dhe destinacioni kryesor për turistët nga Malajzia, po kthehet ngadalë në normalitet.

Punonjësit e bashkisë filluan të largojnë mbeturinat e përmbytjeve dhe të riparojnë rrugët në qytet për të pastruar sipërfaqet për qarkullim pasi përmbytjet nga shiu dhe kanalet e tej-mbushura paralizuan qytetin.

Situata e përgjithshme e përmbytjeve në komunën Hat Yai është përmirësuar, sipas bashkisë.

Përmbytjet, megjithatë, vazhduan në shumicën e zonave në rajon me disa pjesë të rrugëve kryesore ende të zhytura.

Motoristët këshillohen të kontrollojnë informacione të përditësuara nga departamenti i provincave dhe autostradave për arsye sigurie.

Autoritetet e motit sot paralajmëruan për shira të dendur, erëra të forta dhe det të stuhishëm në provincat Songkhla dhe Narathiwat, ndërsa shira të rrëmbyeshëm priten në provincat Phatthalung dhe Yala. /AA

• 

• 

•