Real Madrid po e monitoron nga afër trajnerin e Como 1907, Cesc Fàbregas, pas punës së tij mbresëlënëse këtë sezon në Serie A. Sipas raportimeve nga Spanja, emri i tij është vendosur në listën e ngushtë të kandidatëve për stolin e klubit madrilen për sezonin e ardhshëm.

Sipas analistit Jorge Picón nga El Desmarque, drejtuesit e klubit madrilen janë impresionuar nga stili i punës dhe qasja taktike e Fabregasit, duke e konsideruar atë një kandidat serioz për projektin e ardhshëm në “Santiago Bernabéu”. Aktualisht, skuadra drejtohet përkohësisht nga Álvaro Arbeloa, pasi Xabi Alonso u shkarkua në janar.

Megjithatë, trajneri spanjoll thuhet se dëshiron të vazhdojë projektin e nisur te Como, ku skuadra po zhvillon një sezon shumë pozitiv dhe aktualisht renditet në vendin e katërt në kampionat, në garë për kualifikim në Ligën e Kampionëve. Nën drejtimin e tij, klubi është gjithashtu në gjysmëfinale të Coppa Italia, ku do të përballet me Inter Milan.

Fabregas, vetëm 38 vjeç, e nisi karrierën si trajner menjëherë pas pensionimit në vitin 2023. Ish-mesfushori, i formuar në akademinë e FC Barcelona, ka luajtur gjithashtu për Arsenal, Chelsea dhe AS Monaco.

Gjatë projektit të Comos, klubi ka përfituar edhe nga investimet e pronarëve të tij, ndërsa një nga transferimet më të rëndësishme ka qenë mesfushori i ri Nico Paz, për të cilin Real Madridi ka një klauzolë riblerjeje.

KosovaPress