Agjencia e Statistikave të Kosovës ka publikuar raportin tematik “Të dhënat e Tregut të Punës sipas Komunave”, i bazuar në rezultatet e ReKos 2024.

Sipas këtij raporti, shkalla e papunësisë në Kosovë rezulton të jetë 13.9%. Nga të dhënat e publikuara, rreth dy të tretat e popullsisë (1,063,687 persona) janë në moshë pune. Prej tyre, 514,791 persona janë ekonomikisht aktivë, ndërsa 548,896 konsiderohen joaktivë. Numri i të punësuarve është 443,364, ndërsa i të papunësuarve 71,427.

Raporti ofron një pasqyrë të detajuar të tregut të punës në nivel komunal, duke përfshirë të dhëna për punësimin, papunësinë dhe popullsinë joaktive, si dhe shpërndarjen sipas gjinisë, moshës, arsimit, profesioneve dhe aktiviteteve ekonomike.

Një nga sfidat kryesore që theksohet në raport mbetet shkalla e lartë e jo-aktivitetit, e cila arrin në 51.6%. Kjo dukuri është më e theksuar tek femrat, me 65.4%, krahasuar me 37.8% te meshkujt.

Sa i përket strukturës së punësimit, sektorët kryesorë që dominojnë janë tregtia me 19.7%, prodhimi me 12.7%, ndërtimtaria me 9.6%, arsimi me 8.5% dhe administrata publike me 8.2%. Femrat janë të përqendruara kryesisht në tregti, arsim dhe shëndetësi, ndërsa meshkujt dominojnë në tregti, prodhim, ndërtimtari dhe shërbime.

ASK thekson se dallimet mes të dhënave të Regjistrimit të Popullsisë dhe Anketës së Fuqisë Punëtore janë të pritshme për shkak të metodologjive të ndryshme. Për këtë arsye, Anketa e Fuqisë Punëtore mbetet burimi kryesor për statistikat e tregut të punës, ndërsa të dhënat nga regjistrimi shërbejnë si bazë plotësuese për analiza më të detajuara.

Raporti synon të ndihmojë institucionet dhe politikëbërësit në hartimin e politikave më efektive për zhvillimin ekonomik dhe rritjen e punësimit në nivel lokal dhe qendror.

/Kosovapress/