Ministri në detyrë i Punëve të Jashtme, Glauk Konjufca, ka përfaqësuar Kosovën në Forumin e Dubrovnikut, ku liderë shtetesh, diplomatë dhe ekspertë të politikës diskutuan mbi rendin e ri ndërkombëtar dhe sfidat që lidhen me të ardhmen e Evropës.

Konjufca bëri të ditur se, në margjinat e forumit, zhvilloi një takim me ministrin e Punëve të Jashtme dhe Evropiane të Kroacisë, Gordan Grliq Radman, me të cilin diskutoi për marrëdhëniet dypalëshe, bashkëpunimin në fushën e sigurisë dhe mbrojtjes, si dhe mbështetjen e vazhdueshme të Kroacisë për integrimin euroatlantik të Kosovës.

Ai theksoi se Kroacia mbetet një vend mik dhe partner i rëndësishëm i Kosovës, ndërsa shprehu mirënjohje për mbështetjen që Zagrebi i ka dhënë Prishtinës në proceset e saj ndërkombëtare.

"E falënderova ministrin Radman për mikpritjen në Dubrovnik, për organizimin e këtij forumi të rëndësishëm dhe për përkrahjen e qartë që Kroacia i ka dhënë Kosovës në momentet e saj të rëndësishme", ka shkruar Konjufca.

Ministri në detyrë mori pjesë edhe në panelin "The EU and the Western Balkans: Resolving Unfinished Business Together", ku u diskutuan sfidat e pazgjidhura të Ballkanit Perëndimor dhe perspektiva evropiane e rajonit.

Sipas tij, paqja, stabiliteti dhe e ardhmja evropiane e Ballkanit Perëndimor duhet të ndërtohen mbi parime të qarta dhe jo mbi shtyrje të pafundme të proceseve.

Konjufca ritheksoi se Kosova mbetet e përkushtuar ndaj fqinjësisë së mirë, bashkëpunimit rajonal dhe synimit për t'u bërë pjesë e plotë e familjes euroatlantike.

/Kosovapress/