Mikel Arteta ka vendosur të stimulojë skuadrën e Arsenalit me disa metoda stërvitore mjaft të pazakonta pas dështimeve të fundit që goditën moralin e ekipit.

Pasi u mposhtën nga Manchester City në finalen e Carabao Cup dhe u eliminuan në mënyrë befasuese nga Southampton në çerekfinalen e FA Cup, ëndrra për një "quadruple" historik u shua brenda pak ditësh.

Sipas një raportimi nga Daily Mail, lojtarët u panë në qendrën stërvitore "Sobha Realty" duke kryer ushtrime absurde, si mbajtja e topit vetëm me koka në grupe prej katër personash dhe balancimi i stilolapsave mes majave të gishtave ndërsa pasonin topin. Këto metoda, ndonëse synojnë rritjen e përqendrimit dhe punës në grup, kanë ngritur shumë pyetje në botën e futbollit.

Reagimet në rrjetet sociale kanë qenë të ashpra dhe tallëse ndaj teknikut spanjoll, duke i cilësuar këto veprime si "gimmicks" (trike) të radhës.

Një fans shkroi në platformën X: "Dhe ju doni të fitoni Champions League me këtë lloj stërvitjeje?," ndërsa një tjetër parashikoi se "kjo stërvitje do të rezultojë sërish në katastrofë."

Kjo nuk është hera e parë që Arteta përdor strategji të tilla; ai ka punësuar më parë hajdutë xhepash për të testuar vigjilencën e lojtarëve dhe ka përdorur një llambë elektrike në dhomat e zhveshjes për të simbolizuar "energjinë".

Pavarësisht kritikave për këto metoda "të çmendura", Arsenali mbetet nëntë pikë para Manchester City-t në Premier League, dhe Arteta duket i gatshëm të bëjë çdo gjë – sado e çuditshme qoftë – për të siguruar titullin e parë kampion pas 22 viteve.

Linku i videos në X

KosovaPress