(E përditësuar) Ish-komandanti i Zonës Operative të Llapit, Rrustem Mustafa është deklaruar pas intervistimit nga hetuesit e Speciales. Ai ka thënë se i është sekuestruar telefoni i tij ndërsa ka bërë të ditur se biseda zyrtare është bërë në zyret e EULEX-it.

Ish-komandant Remi ka thënë se hetuesit e Speciales kishin shkuar në shtëpinë e tij dhe i kishin prezantuar një urdhër për kontroll të telefonit.

“Sonte rreth orës 20:00 para shtëpisë time më janë prezentuar hetuesit e Gjykatës Speciale të Kosovës me një urdhër nga prokuroria e Gjykatës Speciale për kontroll të telefonit. Gojarisht më shpjeguan se duhet të bëjmë një bisedë zyrtare në zyre të Eulexit. Personeli nga Gjykata Speciale janë sjellur me respekt. Në zyre të Eulexit më është sekuestruar  telefoni im dhe posa është bërë kjo kontroll pa asnjë interesim shtesë nga ana e tyre, ka përfunduar biseda dhe tani gjendem në shtëpi”, ka shkruar Remi.

......................

Pas intervistimit, lirohet Rrustem Mustafa

Ish-komandanti i Zonës Operative të Llapit, Rrustem Mustafa është liruar pasi u intervistua nga Specialja të martën.

Sipas familjarëve, intervistimi është bërë në bazën e EULEX-it në Fushë Kosovë prej ku edhe është liruar.

KosovaPress ka pyetur edhe Zyrën e Prokurorit të Specializuar por nga kjo zyrë kanë thënë se nuk kanë asnjë koment lidhur me këtë.

....................

Arrestohet ish-komandant Remi

Është arrestuar ish-komandanti i Zonës Operative të Llapit, Rrustem Mustafa. Ai është dërguar në bazën e EULEX-it në Fushë Kosovë, ka mësuar KosovaPress.

Muaj më parë, ish-komandant Remi ka dëshmuar në procesin gjyqësor kundër ish-krerëve të UÇK-së në Hagë.

I ftuar nga Zyra e Prokurorit të Specializuar, Remi ishte intervistuar për disa ditë me radhë edhe nga mbrojtja e të akuzuarve.

Pas përfundimit të dëshmisë së tij, ai kishte shkruar se është "e rëndë ndjesia të keni përballë bashkëluftëtarët me akuza aq të padrejta”.