Një burrë i cili dyshohej se spiunonte për Rusinë, “të paktën” që nga maji i vitit 2025, është ndaluar në Berlin, thanë prokurorët gjermanë të mërkurën, njofton dpa, përcjellë KosovaPress.

Një gjyqtar i Gjykatës Federale të Drejtësisë pritet të vendos nëse ai do të mbahet në paraburgim.

Sipas prokurorisë federale, personi me shtetësi nga Kazakistani kishte qenë në kontakt me shërbimet sekrete moskovite.

Autoritetet përkatëse pretendojnë se ai kishte përcjellë informacione mbi mbështetjen ushtarake të Gjermanisë për Ukrainën, si dhe mbi industrinë gjermane të armëve dhe mbrojtjes. Thuhet se informacioni për të cilin ai ka qenë më shumë I fokusuar ishte për kompanitë që zhvillojnë dronë dhe robotë.

I dyshuari akuzohet gjithashtu se ka dërguar në mënyrë të përsëritur fotografi të ndërtesave publike në Berlin dhe të kolonave ushtarake në autostrada, përfshirë edhe një “kolonë të një shteti të NATO-s”.

Ai besohet gjithashtu se ka informuar kontaktin e tij në shërbimin rus të inteligjencës për objektiva të mundshëm sabotazhi në Gjermani dhe se ka ofruar të rekrutojë persona për një njësitë të sabotazhit dhe spiunazhit.

Nuk ishte e qartë nëse i dyshuari ishte paguar për shërbimet e tij, por burime të sigurisë sugjerojnë, sipas raportimit të dpa, se ai me gjasë i kishte ofruar ato nga bindja personale.

Zyra Federale e Prokurorit Publik në Gjermani ka qenë prej kohësh e shqetësuar për spiunazhin rus, me disa agjentë të dyshuar të arrestuar vetëm që nga fillimi i këtij viti.

Në janar, një grua gjermano-ukrainase u ndalua nën dyshimin se kishte spiunuar për një shërbim rus të inteligjencës, duke mbledhur informacione për pjesëmarrësit në ngjarje politike të nivelit të lartë, duke pyetur për lokacionet e industrisë së armëve dhe për furnizimet e planifikuara me dronë për Ukrainën. Ajo thuhet se kishte kontaktuar ish-punonjës të Ministrisë gjermane të Mbrojtjes, që i njihte personalisht.

Më pas, në mars, dy burra të dyshuar për spiunazh për Rusinë u ndaluan në Rheine, në landin e Renanit Verior-Vestfalisë, dhe në Elda të Spanjës, të dyshuar se kishin spiunuar një person që dërgonte dronë nga Gjermania në Ukrainë. Hetuesit thonë se ata synonin të përgatisnin “operacione të mëtejshme inteligjence kundër objektivit”.

Pak kohë më pas, një burrë u arrestua në Hagen, me dyshimin se kishte spiunuar për Rusinë ndaj një ish-luftëtari të forcave të armatosura ukrainase në Gjermani.

Arrestime me motive të ngjashme – spiunazh për Rusinë – kanë ndodhur edhe më herët në Gjermani.