Edicioni i parë i “Javës së Muraleve Arbëreshe”, i promovuar nga shoqata Fili Meridiani APS, u përmbyll, siç u vlerësua, me sukses në Pallagorio të Italisë, duke e shndërruar këtë komunitet arbëresh në “një galeri arti në qiell të hapur” dhe një pikë takimi mes Arbërisë dhe Kosovës.

Iniciativa u realizua edhe në bashkëpunim me Mural Fest Kosova dhe Universitetin e Shkencave të Aplikuara në Ferizaj, nën patronazhin e Komunës së Ferizaj

Gjatë një jave, artistë nga Kosova realizuan murale që pasqyrojnë historinë, kulturën dhe identitetin e përbashkët arbëresh, duke krijuar ura simbolike mes dy brigjeve të Mesdheut. Në aktivitet morën pjesë përfaqësues të Universitetit të Shkencave të Aplikuara në Ferizaj, artistë, studiues dhe institucione lokale, duke forcuar bashkëpunimin kulturor dhe akademik ndërkombëtar.

Programi përfshiu punëtori për të rinjtë, tryeza diskutimi mbi rolin e artit në mbrojtjen e trashëgimisë kulturore, ekspozita fotografike e digjitale, si dhe aktivitete të shumta muzikore që promovuan traditën arbëreshe.

Një nga momentet më domethënëse ishte realizimi i një murali kushtuar Don Sergio Spezzano, figurë e njohur për angazhimin e tij në mbështetje të paqes gjatë luftës në Kosovë.

Organizatorët dhe autoritetet lokale shprehën vullnetin që kjo nismë të shtrihet edhe në komunitete të tjera arbëreshe dhe të kthehet në një manifestim të përvitshëm.

Presidenti i shoqatës Fili Meridiani APS, Ettore Bonanno, tha se manifestimi i tejkaloi pritshmëritë dhe dëshmoi fuqinë e artit si mjet bashkimi.

“Gjatë këtyre ditëve kemi parë se si arti u shndërrua në një mjet konkret pjesëmarrjeje, takimi dhe ndërtimi marrëdhëniesh. Rezultati më i rëndësishëm është ndërtimi i urave midis njerëzve, institucioneve dhe territoreve të ndryshme, duke konfirmuar se kultura mund të jetë një motor i fuqishëm dialogu dhe zhvillimi”, u shpreh Bonanno, sipas një njoftimi të Fili Meridiani, transmeton KosovaPress.

Sipas tij, “Java e Muraleve Arbëreshe” nuk është fundi i një projekti, por fillimi i një rrugëtimi afatgjatë për forcimin e identitetit arbëresh dhe bashkëpunimit kulturor ndërkombëtar. /KosovaPress/

/Kosovapress/