Sërgjan Cvijiq nga Qendra e Beogradit për Politika të Sigurisë, duke komentuar agresinin e Serbisë më 24 shtator në Banjskë të Zveçanit, ka thënë se potenciali për ripërtëritje të konfliktit në Kosovë, por edhe në Bosnje-Hercegovinë, ekziston ende.

Ai në një intervistë për gazetën serbe “Nova”, ka thënë se megjithëse shumica e popullsisë në rajon është krejtësisht e papërgatitur për një luftë të re, nuk duhet të anashkalohet fakti se konfliktet më të vogla sikurse ai në Banjskë, në një farë mënyre e normalizojnë gradualisht dhunën dhe se sapo të dalë jashtë kontrollit, ajo vështirë të ndalet.

Cvijiq ka potencuar se nëse konstatohet se Vuçiqi është i përfshirë drejtpërdrejt në sulmin në Banjskë, pasojat për popullin serb do të jenë të pallogaritshme.

“Këtu nuk bëhet fjalë vetëm për sanksione, por në fund të fundit edhe për rrezikimin e drejtpërdrejtë të pozitës negociuese ndërkombëtare të Serbisë kur bëhet fjalë për Kosovën dhe procesin e zgjerimit të BE-së. Në një kohë shumë të shkurtër për fajin e regjimit do të ktheheshim në gjendjen katastrofike që jetonim në vitet ’90”, ka shtuar Cvijiç. BE-ja tashmë ka “skicuar” disa nga “masat ndëshkuese” ndaj Serbisë për shkak të dyshimeve se është përfshirë në sulmin terrorist të 24 shtatorit.  Vendosja e “masave ndëshkuese” ndaj Serbisë varet nga bashkëpunimi i plotë dhe i pakushtëzuar i presidentit serb në kryerjen e hetimeve në lidhje me sulmin.