Albion Rrahmani e ka nisur në mënyrën më të mirë aventurën e tij te Venezia, duke shënuar gol në ndeshjen e parë miqësore me fanellën e skuadrës italiane, e cila triumfoi 4:2 ndaj Dolomiti Bellunesi në Falcade.

Sulmuesi kosovar u inkuadrua në pjesën e dytë nga trajneri Giovanni Stroppa dhe la menjëherë përshtypje pozitive. Fillimisht kontribuoi në aksionet sulmuese të ekipit, ndërsa në minutën e 88-të realizoi golin e katërt të Venezias me një goditje të saktë me të djathtën, duke vulosur fitoren e skuadrës së tij.

Kjo ishte ndeshja e parë miqësore e Venezias në kuadër të përgatitjeve verore, vetëm shtatë ditë pas nisjes së grumbullimit. Përballë më shumë se 2 mijë tifozëve, trajneri Stroppa aktivizoi 22 futbollistë, ndërsa debutimi me gol i Rrahmanit ishte një nga momentet më të spikatura të takimit.