Drejtori i të ashtuquajturës Zyrë për Kosovën në Qeverinë e Serbisë, Petar Petkoviq, ka reaguar ashpër ndaj deklaratave që e fajësojnë ish-nënkryetarin e Listës Serbe, Millan Radoiçiq, për gjendjen e serbëve në Kosovë, transmeton KosovaPress.

Përmes një postimi në rrjetin social “X”, Petkoviqi e cilësoi si “akuzë të mjerë dhe të turpshme” pretendimin se Radoiçiq është përgjegjës për, siç u shpreh ai, “terrorin ndaj serbëve”, duke insistuar se përgjegjësia bie mbi kryeministrin e Kosovës, Albin Kurti.

“Është një akuzë e mjerë dhe e turpshme të thuhet se për terrorin ndaj serbëve është fajtor Radoiçiqi, e jo Kurti, i cili urren serbët”, shkroi Petkoviqi duke pretenduar se serbët në Kosovë janë nën presion.

Ai gjithashtu sulmoi politikanët serbë në opozitë, Mirosllav Aleksiq dhe Nenad Rashiq, duke thënë se ata nuk e kuptojnë se çfarë do të thotë patriotizëm.

“Aleksiqi më në fund duhet të mësojë se një patriot serb nuk e dëbon popullin e vet, por lufton për të me zemër e me shpirt, ashtu siç as Aleksiqi dhe as Rashiqi nuk do ta kuptojnë kurrë, e aq më pak do të dinë ta bëjnë”, shkroi ai.

/Kosovapress/