Në Ditën Ndërkombëtare të Punëtorëve, Asociacioni i Gazetarëve të Kosovës ka ngritur shqetësimin për kushtet e punës së gazetarëve dhe punonjësve medialë në Kosovë, duke theksuar se të drejtat bazike të punës nuk po respektohen në këtë sektor.

Sipas AGK-së, shumë gazetarë vazhdojnë të punojnë me paga minimale, pa sigurime shëndetësore dhe pa kontrata stabile, ndërsa përballen me orare të gjata pune, shpesh edhe gjatë festave dhe ditëve të pushimit, pa kompensim adekuat.

“Shkeljet si vonesat në paga, mungesa e pushimeve dhe pasiguria profesionale mbeten të përhapura.

Gjendja paraqitet edhe më e rëndë për gratë gazetare, të cilat shpesh hasin vështirësi në realizimin e të drejtave të garantuara me ligj, përfshirë pushimin e lehonisë dhe të drejtën për gjidhënie”, thuhet në reagim.

AGK thekson se mungesa e një sindikate gjithëpërfshirëse i lë punonjësit medialë të pambrojtur ndaj abuzimeve, ndërsa u bën thirrje institucioneve, veçanërisht Inspektoratit të Punës, që të rrisin mbikëqyrjen dhe të ndërmarrin veprime konkrete.

Po ashtu, pronarëve të mediave u kërkohet të respektojnë legjislacionin në fuqi dhe të sigurojnë kushte dinjitoze për punonjësit, ndërsa gazetarët inkurajohen të mos i tolerojnë shkeljet dhe të kërkojnë mbrojtje për të drejtat e tyre.

/Kosovapress/