Specialisti i kirurgjisë së kokës dhe qafës, Alfred Aga ka vlerësuar rëndësinë e kongreseve shkencore për shkëmbimin e përvojave dhe njohjen me zhvillimet më të fundit në fushën e mjekësisë.

Teksa po merr pjesë në ligjërues në Kongresin e 14-të Ballkanik i Otorinolaringologjisë dhe Kirurgjisë së Kokës dhe Qafës (ORL dhe KKQ), Aga beson se këto aktivitete u mundësojnë profesionistëve të shëndetësisë të njihen me teknologjitë e reja dhe arritjet më të fundit shkencore në kirurgjinë e kokës dhe qafës.

Mjeku specialist i otorinolaringologjisë (ORL) nga Shqipëria, Alfred Aga theksoi se kushtet në Kosovë dhe Shqipëri janë duke u përmirësuar vazhdimisht, si në aspektin e infrastrukturës spitalore ashtu edhe në përditësimin profesional të mjekëve.

“Është shumë e rëndësishme kjo gjë pasi ne njihemi me teknologji të reja, njihemi me më të rejat e shkencës  në fushën e kirurgjisë  kokës dhe qafës pavarësisht të gjitha në praktikat e përditshme punojmë me teknologjinë e fundit ka gjithmonë të reja të cilat shërbejnë në këto kongrese për të mësuar dhe avancuar nga njëri-tjetri. Mund të them se kushtet në Kosovë dhe Shqipëri po përmirësohen dita  ditës infrastruktura spitalore dhe updating i doktorëve është në nivele evropiane ka punë për tu bërë akoma, por jemi në rrugën e mbarë“, deklaroi Aga.

Sipas Agës, përfituesit më të mëdhenj të këtyre kongreseve janë specialistët e rinj, të cilët përveçse marrin njohuri nga kirurgët me përvojë, krijojnë edhe lidhje profesionale me kolegë nga institucione të ndryshme shëndetësore në botë.

“Ky kongres shërben më së shumti për të rinjtë, për specialistët të cilët futën në këtë fushë, përveçse mësojnë nga kirurgët më me përvojë, ata krijojnë dhe lidhje me kirugë nga spitale të ndryshme të botës”, deklaroi Aga.

Kongresi i 14-të Ballkanik i Otorinolaringologjisë dhe Kirurgjisë së Kokës dhe Qafës (ORL dhe KKQ), një nga ngjarjet më të rëndësishme shkencore mjekësore në rajon, i cili po mbahet në Prishtinë.

Kongresi organizohet nga Shoqata e Otorinolaringologëve dhe Kirurgëve të Kokës dhe Qafës e Kosovës në bashkëpunim me partnerë vendorë dhe ndërkombëtarë.

/Kosovapress/