Oligarku rus Roman Abramovich dhe negociatori ukrainas i paqes kanë simptoma të helmimit pasi u takuan në Kiev në fillim të këtij muaji, shkruan The Wall Street Journal.

WSJ u referohet njerëzve të afërt me të dy për këtë informacion.

Pas një takimi në kryeqytetin ukrainas, Abramovich, i cili udhëtoi midis Moskës, Lviv dhe vendeve të tjera të negociatave, si dhe të paktën dy anëtarë të lartë të ekipit negociues ukrainas, shfaqi simptoma duke përfshirë skuqjen e syve, lotim të vazhdueshëm.

Historia e simptomave të helmimit te disa persona konfirmohet edhe nga Bellingcat, një shoqatë holandeze e gazetarëve investigativë e specializuar në vërtetimin e fakteve.

“Bellingcat mund të konfirmojë se tre anëtarë të delegacionit që morën pjesë në bisedimet e paqes midis Ukrainës dhe Rusisë në natën e 3-4 marsit 2022, përjetuan simptoma në përputhje me helmimin me armë kimike. Një nga viktimat është sipërmarrësi rus Roman Abramovich”, shkruan ata.

Roman Abramovich mori pjesë në negociatat e paqes si ndërmjetës midis palëve ndërluftuese. Ai dyshohet se e ka marrë personalisht mesazhin që Volodomyr Zelensky i ka dërguar Vladimir Putin-it.

Abramovich, si shumica e oligarkëve, përfundoi nën sanksione.

Presidenti ukrainas Volodymyr Zelensky, siç u raportua pesë ditë më parë, i kërkoi presidentit Joe Biden në një bisedë telefonike që të mos vendosë sanksione ndaj oligarkut rus Roman Abramovich, sepse ai mund të provojë të jetë një ndërmjetës i dobishëm në bisedimet e paqes me Moskën.

Si rezultat, Shtëpia e Bardhë siguroi Ministrinë e Financave që të mos vazhdojë me planet për vendosjen e sanksioneve ndaj Abramovich, sipas burimeve të njohura me situatën.

Të njëjtat burime thonë se Biden është konsultuar me Zelensky-n për një sërë sanksionesh, përfshirë ato që kanë të bëjnë me Abramovich.