Kryetari i Lidhjes Demokratike të Kosovës, Lumir Abdixhiku ka paralajmëruar, sot, vetëm një ditë pas zgjedhjeve ku partia e tij u radhit e treta, se do bëhen reforma të thella të brendshme që parashohin largimin e atillëve, që sipas tij, “vetëm marrin pa dhënë, pengojnë e shpresojnë në rrënim kolektiv për përfitim individual”.

Duke i falënderuar votuesit dhe veprimtarët që partisë ia siguruan 20 mandate, Abdixhiku u zotua se “nuk do të lejojnë që mundi i tyre të shpërdorohet më nga asnjë protagonizëm individual”.

“LDK-ja juaj është në rrugën e drejtë. Bashkimi sapo ka nisur; dhe siç ju kemi thënë ky bashkim nuk do të ndalet. Do të vazhdojmë angazhimin tonë gjithandej Kosovës. Që nga sot madje. Ka ende shumë njerëz që presin ftesën tonë, shumë energji të mira e të reja që duan të bëhen pjesë e këtij rrugëtimi”, shkroi ai në llogarinë e tij në Facebook.

“Përpara nesh kemi edhe reforma të thella të brendshme. Na duhen njerëz që i japin vizionit tonë, që ndërtojnë bashkë me ne, e jo të tillë që vetëm marrin pa dhënë, pengojnë e shpresojnë në rrënim kolektiv për përfitim individual. Këto reforma do t’i bëjmë. Me prioritet, shpejtë dhe qartë si kurrë më pare” shtoi ai.

Në postim, Abdixhiku rivlerësoi se Kosova jonë vazhdon të jetë në krizë, dhe se LDK-ja, sipas tij, për të dytën herë arriti të krijojë parakushte për balancë demokratike para kontrollit absolut.

“Nuk ishte e lehtë. Pa punën tonë Kosova do të dukej e frikshme. Tani na duhet maturi, vizion, dhe apetit për zhvillim të vendit”, shkroi ai, për të përfunduar me porositë e zotimet: “Prandaj, një rrugë e gjatë na pret përpara. Dhe këtë rrugë do ta ecim bashkë” .