Në Kuvendin e Kosovës po vazhdon debati parlamentar për rritjen e çmimit të naftës.

Kryetari i Lidhjes Demokratike të Kosovës (LDK), Lumir Abdixhiku ka kritikuar qeverinë, duke thënë se po ua garanton fitimin kompanive. Për këtë ka reaguar më pas ministrja e Tregtisë, Mimoza Kusari Lila.

“Mimoza ishte pak më zemërgjerë tha po e bëjë një hap tutje, po ja njoh të drejtën morale, pse e keni thirr këtë seancë. Faleminderit Mimozë. E ministri i Financave, i cili sot dridhi  eshtrat edhe të Kejnsit edhe të Smithit, të dyve bashkë, tha e keni thirr këtë seancë se po doni me i mbrojt bizneset. E tash e nja katër-pesë vjet të vetmit që janë duke fituar prej krizës së naftës besoni janë bizneset dhe a e dini pse, sepse kjo qeveri prapa meje ua garanton këtë fitim, luftërat nisin, përfundojnë, rinisin disa tjera, përfundojnë ato, një gjë në terminologjinë e Vetëvendosjes mbetet konstante është fitimi i garantuar prej Ministrisë, Tregtisë dhe Industrisë për Bizneset e Kosovës”, deklaroi ai. 

“Zotëri Abdixhiku nëse vie me akuzën e rëndë se kompanitë i mbrojmë nga ministria jonë, të lutem referoju saktë me emër dhe mbiemër dhe trego kush janë kompanitë prej të cilave ne përfitojmë. Ti e the këtu para të gjithëve është e incizuar...Të lutem, thuani publikisht, kush do qoftë, cili do emër, nuk ju takon të bëni spekulime, aludime për emrash kompanish nga foltorja e kuvendit, thuajeni publikisht, kush janë kompanitë që i mbrojnë”, tha ajo.