Pavarësisht spekulimeve se finalja e Kupës së Botës 2026 kundër Spanjës mund të ishte ndeshja e fundit e Lionel Messit me Argjentinën, Ángel Di Maria ka bërë të qartë se nuk beson se kapiteni i "Albiceleste" është pranë pensionimit.

Pas humbjes 1:0 nga Spanja në finalen e Kupës së Botës, ku Argjentina nuk arriti ta mbrojë titullin e fituar në Katar më 2022, u përfol se Messi mund t'i jepte fund karrierës ndërkombëtare. Megjithatë, Di Maria i hodhi poshtë këto zëra në një intervistë për TNT Sports.

"Po, Leo duhet të vazhdojë për aq kohë sa të dëshirojë. Mendoj se mund të vazhdojë për shumë vite të tjera", deklaroi Di Maria.

Ai vlerësoi nivelin që Messi vazhdon të tregojë edhe në moshën 39-vjeçare, duke theksuar se ai mbetet një nga futbollistët më të mirë në histori.

"Në moshën 39-vjeçare, ai ka dëshmuar se është ende një nga më të mirët, në fakt një nga më të mirët në historinë e futbollit, dhe nuk mendoj se ka një kufi për atë që ai mund të ofrojë", u shpreh ai.

Di Maria komentoi edhe të ardhmen e përzgjedhësit Lionel Scaloni, duke shpresuar që ai të vazhdojë në krye të Argjentinës.

"Ai është lideri i kësaj 'Scaloneta' dhe shpresoj që të vazhdojë. Besoj se po ndërton një brez të mrekullueshëm lojtarësh të rinj dhe kjo është në interes të ekipit kombëtar", tha ish-anësori argjentinas.

Në fund, Di Maria theksoi se vendimi për të ardhmen i takon vetëm Messit, por si tifoz dhe bashkëkombës dëshiron ta shohë atë ende me fanellën e Argjentinës.

"Vendimi është i tiji. Ai e di çfarë dëshiron, por si argjentinas shpresoj që të vazhdojë misionin e tij me ekipin kombëtar", përfundoi Di Maria.

KosovaPress