Tridhjetë e katër persona janë arrestuar në kuadër të operacionit të Policisë se Kosovës dhe Drejtorisë për Hetimin e Krimit të Organizuar dhe Krimeve të Rënda.

Ky operacion u zhvillua në rajonin e Mitrovicës, Vushtrrisë, Istogut dhe Skenderajt, ku qëllim kishte luftimin e skemave piramidale dhe bixhozit të paligjshëm.

Sipas një komunikate të përbashkët të Policisë dhe Prokurorisë Themelore në Mitrovicë, janë bastisur rreth 50 lokacione të ndryshmen janë sekuestruar rreth 170 mijë euro para të gatshme, pesë automjete, armë zjarri si dhe pajisje e materiale të tjera të përdorura për zhvillimin e aktiviteteve të kundërligjshme.

“Veprime policore në këtë fushëveprim, gjithashtu janë ndërmarr edhe nga hetimet rajonale dhe stacionet kompetente policore, ku ka pasur rezultate konkrete në parandalim dhe po ashtu arrestim të personave të dyshuar për përfshirje në vepra të ndryshme penale. Në totalin e bastisjeve/kontrolleve dhe arrestimeve janë përfshirë edhe veprimet e ndërmarra policore në Skenderaj, ku janë kontrolluar 15 lokacione të ndryshme, 8 persona janë arrestuar dhe nga ta 4 janë dërguar në mbajtje”, thuhet në njoftim.

Policia bën të ditur se bashkëpunimi ndërinstitucional ka qenë kyç në arritjen e këtyre rezultateve konkrete.

/Kosovapress/