Lionel Messi vazhdon të mahnisë botën e futbollit me mënyrën se si po menaxhon energjinë e tij në Kupën e Botës 2026, ndërsa Argjentina përgatitet për gjysmëfinalen e madhe kundër Anglisë.

Sipas një analize të publikuar nga BBC, kapiteni argjentinas e ka kaluar rreth 47 për qind të kohës së tij në fushë duke ecur, përqindja më e lartë mes të gjithë futbollistëve në turne. Megjithatë, kjo nuk ka ndikuar në efikasitetin e tij, pasi Messi vazhdon të jetë lojtari më vendimtar i Argjentinës.

Statistikat tregojnë se 38-vjeçari përshkon mesatarisht 8.2 kilometra për ndeshje dhe realizon vetëm 2.7 sprintime, dukshëm më pak krahasuar me 5.3 sprintime mesatare që kishte katër vjet më parë. Pavarësisht kësaj, ai ka regjistruar 33 goditje drejt portës dhe ka krijuar 21 raste për bashkëlojtarët, shifrat më të mira në një Kupë Bote që nga Diego Maradona në vitin 1986.

Vetë Messi ka pranuar se me kalimin e viteve ka ndryshuar mënyrën e të luajturit. Ai ka theksuar se gjatë bashkëpunimit me Pep Guardiolën mësoi rëndësinë e kontrollit të hapësirave, posedimit të topit dhe aspektit taktik të lojës, duke shtuar se futbolli modern është shumë më fizik dhe taktik sesa në të kaluarën.

Messi aktualisht kryeson garën për "Këpucën e Artë" së bashku me Kylian Mbappe, me tetë gola dhe tri asistime në këtë Botëror. Argjentina synon të bëhet kombi i parë që mbron me sukses titullin e kampionit të botës që nga viti 1962, ndërsa përballë do të ketë Anglinë në gjysmëfinalen që zhvillohet sonte në Atlanta.

Sfida pritet të jetë një test i madh edhe për mbrojtjen angleze, pasi vetëm Polonia ka arritur që në 15 ndeshjet e fundit të Messit në Kupën e Botës ta ndalojë atë të mos shënojë ose asistojë.

KosovaPress