Trajneri portugez Jose Mourinho pritet të mbërrijë këtë pasdite në Madrid për të nisur zyrtarisht mandatin e tij të dytë në krye të Real Madrid. Sipas raportimeve të mediave spanjolle, prezantimi zyrtar i tij para publikut dhe mediave pritet të bëhet gjatë së martës.

Rikthimi i Mourinhos vjen pas rizgjedhjes së Florentino Pérez në krye të klubit. Real Madridi thuhet se ka paguar 15 milionë euro për të aktivizuar klauzolën e lirimit të trajnerit nga Benfica, ndërsa njoftimi zyrtar i marrëveshjes pritet të publikohet së shpejti.

Sipas raportimeve, Mourinho ka nisur menjëherë punën për ndërtimin e skuadrës për sezonin e ri. Ai ka kërkuar afrimin e një qendërmbrojtësi të nivelit të lartë dhe një mbrojtësi të majtë titullar. Në listën e dëshirave të trajnerit përmenden Joško Gvardiol dhe Riccardo Calafiori, ndërsa në klub tashmë janë konfirmuar afrimet e Ibrahima Konaté dhe Denzel Dumfries.

Ndërkohë, ardhja e Mourinhos do të sjellë edhe ndryshime në stafin teknik. Sipas të njëjtave burime, largimi i Álvaro Arbeloa konsiderohet i pashmangshëm dhe klubi pritet ta zyrtarizojë vendimin në orët e ardhshme.

KosovaPress