Kryeministri i Kanadasë, Mark Carney, ka shkaktuar të qeshura gjatë samitit të NATO-s në Ankara, pasi me humor i kërkoi homologut norvegjez, Jonas Gahr Store, që t’ia “huazojë” sulmuesin Erling Haaland për Kombëtaren e Kanadasë në Kupën e ardhshme të Botës.

Gjatë një takimi me kryeministrin e Norvegjisë dhe kancelarin gjerman Friedrich Merz, Carney theksoi rëndësinë e bashkëpunimit mes Kanadasë dhe Norvegjisë, një ditë pasi Ottawa arriti marrëveshje për nëndetëse me një partneritet gjermano-norvegjez.

“Ndërveprueshmëria nënkupton edhe ndarjen e ekuipazheve. Dhe në Kupën e ardhshme të Botës, nëse mund ta ndani me ne Erling Haalandin, do ta vlerësonim jashtëzakonisht shumë”, tha Carney.

Deklarata e tij u prit me të qeshura, ndërsa kryeministri norvegjez iu përgjigj me humor duke bërë një gjest simbolik të vozitjes vikingë.

“Ai nuk është në shitje”, tha ai.

Norvegjia vazhdon paraqitjet mbresëlënëse në Kampionatin Botëror, pasi eliminoi Brazilin në fazën e 1/16-ës dhe të shtunën do të përballet me Anglinë në çerekfinale.

Kanadaja, një nga bashkëorganizatorët e Botërorit, u eliminua javën e kaluar, por realizoi paraqitjen më të mirë në historinë e saj në këtë garë, duke siguruar pikën e parë, fitoren e parë dhe kualifikimin e parë në fazën me eliminim direkt.

KosovaPress