Gjyqtarit somalez Omar Artan i është mohuar hyrja në Shtetet e Bashkuara të Amerikës, pavarësisht se ai është përzgjedhur për të arbitruar në Kupën e Botës 2026.

Sipas autoriteteve amerikane të Doganës dhe Mbrojtjes Kufitare (CBP), një shtetas somalez që ishte planifikuar të merrte pjesë në Botëror u ndalua pas mbërritjes në Aeroportin Ndërkombëtar të Miamit nga Stambolli të shtunën. Edhe pse në deklaratën zyrtare nuk u përmend emri i personit, Artan është i vetmi gjyqtar somalez i emëruar për Kupën e Botës.

CBP bëri të ditur se gjatë procedurave të kontrollit, udhëtari iu nënshtrua verifikimeve shtesë, të cilat konsiderohen pjesë rutinë e procesit të inspektimit kufitar. Pas shqyrtimit, autoritetet amerikane vendosën se ai ishte “i papranueshëm për hyrje për shkak të shqetësimeve të kontrollit” dhe për këtë arsye iu refuzua hyrja në vend.

Autoritetet amerikane theksuan se të gjithë udhëtarët që kërkojnë të hyjnë në SHBA, përfshirë sportistët, trajnerët dhe anëtarët e stafit teknik, i nënshtrohen procedurave të verifikimit. Sipas deklaratës, vendimet për pranueshmërinë merren rast pas rasti në bazë të informacioneve të disponueshme nga agjencitë e sigurisë, emigracionit dhe zbatimit të ligjit. CBP shtoi se zyrtarët kufitarë kanë autoritet të kryejnë intervista, inspektime dhe të përcaktojnë pranueshmërinë për hyrje në përputhje me legjislacionin amerikan.

KosovaPress