Irani planifikon të paraqesë një ankesë zyrtare në FIFA në lidhje me
“kufizimet e vendosura nga organizatorët” ndaj ekipit në Botëror. Atyre u është thënë se do të lejohen të mbërrijnë në Los Angeles vetëm 24 ora para ndeshjes vendimtare më 21 qershor kundër Belgjikës.

Trajneri kryesor i Iranit, Amir Ghalenoei, pas ndeshjes hapëse të Grupit G të Iranit ndaj Zelandës së Re, argumentoi se ata janë skuadra “më e shtypur” në turne, derisa kapiteni Mehdi Taremi, theksoi se problemet logjistike nënkuptonin se javët e fundit kishin qenë një “katastrofë”.

Ndërkohë, Irani ndihet i detyruar të ankohet në FIFA pais u njoftua se, ashtu si para barazimit 2-2 me Zelandën e Re, nuk do të lejohet të mbërrijnë në SHBA dy ditë para ndeshjes, ku federata ka paraqitur argumentin e saj me dëshirën për më shumë kohë për t’u përgatitur në qytetin pritës.

Federata është veçanërisht e pakënaqur me këto kufizime në këtë rast, sepse është një ndeshje që fillon në mesditë sipas orës lokale në Los Angeles të dielën, duke e lënë Iranin të udhëtojë për në aeroportin ndërkombëtar të Los Angeles të shtunën.

Federata bëri të ditur se beson se kufizime të tilla janë në kundërshtim me parimin e ofrimit të kushteve të barabarta për të gjitha ekipet pjesëmarrëse dhe mund të ndikojnë negativisht në proceset përgatitore të ekipeve.

“Si pasojë, federata do të shprehë zyrtarisht pakënaqësinë e saj dhe do të paraqesë një ankesë zyrtare në FIFA përmes kanaleve përkatëse. Pavarësisht këtyre kufizimeve, ekipi kombëtar i Iranit do të vazhdojë programin e tij përgatitor dhe do të mbetet plotësisht i përqendruar në ndeshjen e tij kundër Beligjikës”, njoftoi Federata e Iranit.

Ndeshjen e radhës së Botërorit Irani e luan kundër Belgjikës, më 21 qeshor, nga ora 21:00.

KosovaPress