Edon Zhegrova ishte njëri nga lojtarët më të mirë në fushën e lojës në fitoren që Kombëtarja e Kosovës e realizoi kundër Qipros me rezultat 3-0 në Ligën e Kombeve.

Me driblimet e tij, Zhegrova në disa raste detyroi kundërshtarin që të bënte ndërhyerje të palejueshme ndaj tij, derisa kjo entuziazmonte tifozët në tribuna, raporton KosovaPress.

Megjithatë, trajneri Franco Foda e largoi atë nga fusha në pjesën e dytë, pasi ai ishte i ndëshkuar me karton të verdhë dhe në momentin e zëvendësimit Zhegrova ishte i pakënaqur, por edhe në këto momente ai mori mbështetje nga tifozët dardanë në tribuna.

Duke parë këtë mbështetje, Zhegrova ka falënderuar tifozët përmes një reagimi në rrjetet sociale duke shkruar “Gjithmonë i juaji”.

Kosova do të kthehet me dy ndeshjet e radhës në Ligën e Kombeve muajin e ardhshëm ku do të ballafaqohet me Rumaninë dhe Lituaninë.