“Zemër, ke dështu”, rinia e LDK-së me aksion para Qeverisë në tre vjetorin e fitores së VV-së
Forumi rinor i Lidhjes Demokratike të Kosovës ka organizuar sot një aksion simbolik para Qeverisë së Kosovës, me rastin e 3-vjetorit të fitores së Lëvizjes Vetëvendosje në zgjedhjet e 14 shkurtit të vitit 2021.
Ata kanë shpërndarë fletushka në formë të zemrës për qytetarët, në të cilat shkruhet “Me zemrën në darkë, për zemër jashtë vendit”, “Zemra të mban gjallë, por t’lëshon kur të vjen fatura”, “Zemrën plot, kuletën thatë”.
Kryesuesi i këtij forumi, Paris Guri, tha se edhe në vitin e saj të katërt, kjo qeveri po vazhdon të dështojë në shumë segmente, si në arsim, shëndetësi, ekonomi dhe shumë sfera të tjera.
“Në vitin e saj të katërt kjo qeveri po vazhdon me dështime në arsim, në ekonomi, në shëndetësi, në marrdhënie ndërkombëtare, në ngritjen e mirëqenies së qytetarëve, në energji dhe në secilën sferë tjetër”, tha Guri.
Kujtojmë se në zgjedhjet e fundit parlamentare të mbajtura më 14 shkurt 2021, Lëvizja Vetëvendosje kishte fituar mbi 50% të votave, duke formuar Qeverinë pa pasur nevojë për koalicion me partitë e tjera.
