Deputeti i LDK-së, Armend Zemaj, në konferencë për medie të premten, tha se faktet tregojnë se ministri i Shëndetësisë, Arben Vitia, nuk po punon fare për shëndetësinë.

“Kjo qeveri nëse shumë pak ka punuar në fusha të tjera, po e themi me bindje të plotë se në shëndetësi nuk po punon fare. Janë faktet që tregojnë se nuk kanë punuar fare, madje këto faktet tregojnë qartë paaftësinë e tyre qeverisëse. Për tri vite qeverisje janë ndërruar tre ministra, përfshirë edhe vet Kurtin si të vetë emëruar në komisionin e tij ekzekutiv dhe katër drejtor të SHSKUK-së. Po ashtu nuk ka asnjë strategji për shëndetësi, më shumë se 200 mjekë në vit po na ikin dhe për ikjen e tyre nuk ka asnjë reagim nga qeveria", ka thënë Zemaj.

Në anën tjetër, ai tha se dorëheqjet në Spitalin e Përgjithshëm të Mitrovicës tregojnë për ndërhyrjet politike të ministrit Vitia.

I pyetur për çështjen e draft-statutit të Asociacionit të komunave me shumicë serbe, Zemaj nuk pranoi të flas, teksa tha se LDK-ja do të del me qëndrim nesër pas mbledhjes së Këshillit të Përgjithshëm./KosovaPress/