Plazhet në Sydney të Australisë janë rihapur pasi autoritetet hoqën mijëra topa të zinj misteriozë që testet zbuluan se ishin formuar nga kimikate të ngjashme me ato në produktet e bukurisë dhe pastrimit.

Rreth 2 mijë topa, disa me madhësinë e topave të golfit, janë hedhur nga deti në të gjithë Sydney qe nga e marta, duke detyruar mbylljen e tetë plazheve, përfshirë edhe plazhin ikonik Bondi. Për shkak të frikës se mund jenë shumë toksikë, filloi një operacion i madh pastrimi.

Drejtori ekzekutiv detar Mark Hutchings nga Uellsi i Ri Jugor, tha se topat, të cilët u shfaqën në numër më të vogël të premten, nuk janë të dëmshëm për shëndetin kur lihen në rërë, por nuk duhen prekur.

“Ne tani mund të konfirmojmë se ata përbëhen nga acide yndyrore, kimikate në përputhje me ato që gjenden në produktet e pastrimit dhe produktet e bukurisë dhe disa vaj karburanti,” tha ai.

Agjencia e Mjedisit e Uellsit të Ri Jugor tha se testimi laboratorik po vazhdonte për të përcaktuar se nga erdhën topat.

“Ende nuk është e qartë se nga vijnë dhe na duhen edhe disa ditë për ta kuptuar këtë”, tha drejtori ekzekutiv Stephen Beaman.

Plazhet në Sydney, të njohura për rërën e tyre të artë dhe detin e pastër, tërheqin turistë nga e gjithë bota.