Tre muaj më parë qytetarët në Serbi u tronditën pas vdekjes së 15 personave nga shembja e strehës së rindërtuar të Stacionit Hekurudhor në Novi Sad.

Pas kësaj ngjarjeje tragjike nisën protestat e studentëve, të cilat ende po vazhdojnë, duke kërkuar përgjegjësi për këtë rast. Studentët po kërkojnë që të publikohet dokumentacioni i plotë për rindërtimin e stacionit.

Ata, gjithashtu, kërkojnë që të lirohen aktivistët që janë arrestuar gjatë protestave. Ndërkaq, duan që sulmuesit e protestave të dalin para drejtësisë.

Një aktakuzë kundër 13 personave të dyshuar për rastin tragjik, u ngrit në fillim të nëntorit nga Gjykata e Lartë e Novi Sadit.

Studentët morën përkrahje edhe nga bujqit të cilët bllokuan me traktorë rrugët kryesore në Beograd.

Që prej fundit të nëntorit, dhjetëra mijëra protestues janë në rrugët e Beogradit. Ata bllokuan edhe rrugët kryesore në kryeqendër.

Dorëheqjet erdhëm vetëm pas më shumë se dy muaj protesta masive në Serbi. Postin e kryeministrit e la Millosh Vuçeviq, ndërkaq u largua edhe kryetari i Komunës së Novi Sadit, Millan Gjurgjiq.

Kjo ndodhi pasi disa sulmues rrahën disa studentë me shkop bejsbolli.

Ky nuk është rasti i vetëm, ndaj studentëve pati dhjetëra sulme. Ata u goditën në forma të ndryshme, si dhe u përplasen nga makinat.

Duke treguar se dorëheqjet nuk mjaftojnë, studentët kanë vazhduar aksionet e tyre duke shkuar nga Beogradi në Novi Sad, në një marsh që nisi të enjten.

Të shtunën, në tre mujorin e shembjes së strehës, numër i madh i studentëve dhe qytetarëve kanë bllokuar tri ura në Novi Sad.

Njohësit e çështjeve politike thonë se Beogradi nuk ka parë protesta më masive që prej protestave që përmbysen pushtetin e Sllobodan Millosheviqit.

Për shembull, analistja Ivana Stradner duke komentuar protestat masive në gjithë Serbinë kundër regjimit të Aleksandar Vuçiq, ka thënë se ato ngjasojnë me protestat e mëhershme ndaj atij që njihet si kasapi i Ballkanit.

Në dhjetor, presidenti i Serbisë tha se protestat nuk janë studentore, por sipas tij, ato kanë mbështetje nga jashtë./KosovaPress

https://kosovapress.com/bllokade-ne-novi-sad-qytetaret-pushtojne-urat-studentet-mberrijne-me-kolona