Klubi i futbollit Vushtrria ka njoftuar përmes faqes zyrtare në Facebook se është dënuar nga organet disiplinore me zhvillimin e një ndeshjeje pa praninë e publikut, pas incidenteve të rënda në përballjen ndaj Trepçës ’89.

Sipas raportit zyrtar, gjatë ndeshjes pati hedhje të mjeteve të forta dhe shisheve PVC në drejtim të gjyqtarëve, ndërsa pas vërshëllimës finale u godit edhe një lojtar mysafir, veprime këto që kanë bërë që ndeshja e radhës si vendas kundër KF 2 Korrikut të luhet me dyer të mbyllura.

Duke e parë veten si pretendentë seriozë për rikthimin në elitë, klubi kërkoi nga mbështetësit e shumtë që të tregohen të kujdesshëm dhe të shmangin veprimet që dëmtojnë rëndë rrugëtimin e tyre drejt Superligës.