Eurodeputeti kroat, Tonino Picula, ka deklaruar se presidenti i Serbisë, Aleksandar Vuçiq, po e shfrytëzon pozitën gjeopolitike të vendit të tij në raport me Bashkimin Evropian.

Sipas Piculës, Vuçiq po përpiqet të bindë Brukselin se politika e zgjerimit të Bashkimit Evropian në Ballkanin Perëndimor nuk mund të zbatohet pa Serbinë.

“Vuçiq po përpiqet ta fokalizojë politikën e Brukselit ndaj Ballkanit Perëndimor si një politikë që nuk mund të zbatohet pa Serbinë”, është shprehur ai.

Megjithatë, eurodeputeti kroat vlerësoi se Bashkimi Evropian mund të ndryshojë qasjen ndaj Beogradit dhe të reagojë më ashpër ndaj problemeve demokratike në Serbi.

Sipas tij, masa më efektive për të ndikuar në ndryshimin e politikave të presidentit serb do të ishte ndërprerja e mbështetjes financiare nga Bashkimi Evropian.

“E vetmja gjuhë që Aleksandar Vuçiq e kupton është gjuha e ndërprerjes së fondeve financiare”, deklaroi Picula.